UPDATE: Al-Shabaab: 100 askari ayaan ku Dilnay weerarkii Balli-doogle

Balli-doogle (Halqaran.com) – Al-Shabaab ayaa war kasoo saaray Weerarkii ay ku qaadeen xerada Balli-dogle ee Gobolka Shabeelaha Hoose, halkaas oo ay dagan yihiin Ciidamo Mareykan ah iyo kuwa Dowladda federaalka Soomaaliya.

Sarkaal ka tirsan Al-Shabaab oo la hadlay warbaahintooda ayaa sheegay in khasaaraha hordhaca ah ee la hayo uu yahay in howlgalka lagu dilay in ka badan 100 askari.

“Subaxnimadii hore ee Isniintii saaka, ciidamo gaar ah oo ka tirsan guutada Istish-haadiyiinta ee Al-Shabaab ayaa duullaan halyeeynimo ku qaaday saldhigga ciidamada Mareykanka ee Balli-doogle ee ku yaalla Sh/hoose”

“Garoonkaan oo qiyaastii 100km dhanka waqooyi galbeed kaga beegan Muqdisho ayaa wuxuu hooy u yahay boqolaal ka tirsan military-ga Mareykanka, Saraakiisha UN-ka iyo shirkadaha military ee gaarka loo leeyahay iyo diyaaradaha Mareykanka, wuxuu sidoo kale ka dhigan yahay taliska laga hago diyaaradaha aan duuliyaha lahayn ee Mareykanka”, ayuu yiri Sarkaalka.

Sidoo kale sarkaalka ayaa sheegay in weerarka lagu burburiyay ugu yaraan shan diyaaradood oo isugu jira Drones iyo Helicopters.

Dhanka kale Taliska Ciidammada Xoogga Dalka ayaa xaqiijiyay in ciidanka xoogga iyo Saaxiibbada Mareykanka ee taageera ay iska caabiyeen weerar gawaari loo adeegsaday oo al-shabaab ku qaadeen Saldhigga Balli-doogle ee Gobolka Shabeellaha Hoose.

Xafiiska Halqaran.com, Muqdisho
Halqarannews@gmail.com

Leave a Reply

Your email address will not be published. Required fields are marked *