Madaxweynaha Jubbaland ”DF Somaliya waxay shaqadeeda ku soo arruurtay halkee dhisan oo aan duminaa”!

Madaxweynaha dowlad goboleedka Jubbaland, Axmed Madoobe
Madaxweynaha dowlad goboleedka Jubbaland, Axmed Madoobe

Kismaayo (Halqaran.com) – Madaxweynaha Jubbaland, mudane Axmed Maxamed Islaam ayaa isniintii maanta dib ugu soo laabtey magaalada Kismaayo ee xarunta Dowlad goboleedka Jubbaland, kadib safar shaqo oo uu dalka dibadiisa ugu maqnaa muddo 20 cisho ah.

Madaxweyne kuxigeenka 2aad ee Jubbaland, labada gole ee Dowlad goboleedka Jubbaland iyo qeybaha kala duwan ee ururada bulshada ayaa Madaxweynaha iyo wafdigiisa si diiran ugu soo dhaweeyey garoonka diyaaradaha ee Sayyid Maxamed Cabdille Xasan ee magaalada Kismaayo.

Soo dhaweyn kadib Madaxweynaha ayaa warbaahinta kula hadley qeybta nasashada ee garoonka halkaas oo uu si kooban uga warbixiyey safarkiisa shaqo iyo waxyaabihii u soo qabsoomey.

Madaxweynaha ayaa sheegay in uu inta uu ku sugnaa magaalada Nairobi uu kulamo kala duwan la qaatey Beesha caalamka, Saamileyda Siyaasadeed ee Soomaaliya iyo madaxda dalka aan dariska nahay ee Kenya dhamaantoodna kala hadley arrimo quseeya Amniga, Siyaasadda iyo sidii xalwaara looga gaari lahaa khilaafka DFS iyo Dowlad goboleedyada.

Axmed Madoobe ayaa si kooban uga hadley xaalada gobolka Gedo iyo tallaabooyinka lagu carqaladeynayo amniga iyo Dowladnimada dalka ee ay DFS ka wado halkaas, kuwaas oo uu sheegay inaysan natiijo ka gaari doonin haddii aysan wado wanaagsan u soo marin kana waantoobin baalmarka dastuurka dalka u yaala.

Sidookale, madaxweynaha ayaa sheegay in xaalada Soomaaliya hadda aysan u baahneyn anaa idhi iyo sidaan rabaa socon, ee xalka ay u baahantahay uu yahay wadatashi iyo in isfaham rasmi ah lagaga gaaro waxkasta oo la isku qabto.

Ugu dambeyn, madaxweynaha Jubbaland Axmed Madoobe ayaa sheegay, in Dowladda Federaalka Soomaaliya ay shaqadeeda dhanba kusoo uruurisey halkee dhisan oo aan duminaa ee aysan danta dalka iyo dadka Soomaaliyeed ka shaqeynin taasna xisaabi ka danbeyn doonto.

Xafiiska Wararka Halqaran.com
Halqarannews@gmail.com

LEAVE A REPLY

Please enter your comment!
Please enter your name here