Dowladda Soomaaliya iyo Talyaaniga oo heshiis cusub kala saxiixday

1

Muqdisho (Halqaran.com) – Wasaaradda Ganacsiga iyo Warshadaha XFS iyo Hay’adda dhinaca Horumarinta u qaabilsan dawladda Talyaaniga, ayaa maanta si rasmi ah u kala saxeexday heshiis ku saabsan mashruuc kor looggu qaadayo qeybaha wax-soo-saarka ee Soomaaliya gaar ahaan dhinaca horumarinta Beeraha, Kalluumaysiga iyo Khayraadka kale ee dalka.

Mashruucan oo ay fulinayaan hay’adaha UNIDO, ILO iyo FAO, ayaa munaasibad looggu qabtay xarunta Safaaradda Talyaaniga ee Soomaaliya, waxa si wada-jir ah u saxeexay Wasiirka Wasaaradda Ganacsiga iyo Warshadaha JFS Inj. Cabdullaahi Cali Xasan iyo Madaxa hay’adda Dhinaca Horumarinta ee Talyaaniga Mr. Mr. Gugleilmo Giordano, iyada oo ay goob-joog ka ahaayeen Safiirka dawladda Talyaaniga u fadhiya Soomaaliya Ambassaor Alberto Vecchi, madax ka socotay hay’adaha UNIDO, FAO iy ILO iyo weli ba sidoo kale mas’uuliyiin ka tirsan Wasaaradda Ganacsiga.

Madaxa hay’adda dhinaca horumarinta u qaabilsan Talyaaniga Mr. Gugleilmo Giordano oo halkaas ka hadlay, ayaa sheegay inuu ku faraxsan yahay inay mashruucan ka fuliyaan wadanka, waxaana uu xusay in mashruucani bilow u yahay mashaariic kale oo horumarineed oo ay dalka ka fulinayaan.

Safiirka dawladda Talyaaniga ee Soomaaliya Mr.Ambassaor Alberto Vecchi oo isagu na dhankiisa halkaas ka hadlay, ayaa sheegay inay ka dawlad ahaan ay garab taagan yihiin Soomaaliya isla mar ahaantaana ay diyaar u yihiin inay kala shaqeeyaan dhinacyada horumarka iyo dhismaha dawladnimo ee dalka.

Wasiirka Wasaaradda Ganacsiga iyo Warshadaha Inj. Cabdullaahi Cali Xasan ugu dambeyn halkaas ka hadlay, ayaa sheegay in mashruucani uu ahmiyad weyn u lee yahay guud ahaan dalka, waxaana uu xusay in sidoo kale lagu horumarinaayo hay’adaha dawladda ee qaabilsan dhinaca Wax-soo-saarka dalka isaga oo sidoo kale na tilmaamay in mashruucan ay si wada-jir ah uga soo wada-shaqeeyeen Wasaaradaha Ganacsiga, Kalluumaysiga, Beeraha iyo weli ba sidoo kale hay’adaha caalamiga ah ee fulinaaya mashruucan.

“Mashruucan oo ah mashruuc bilow ah, wuxu horumarin u yahay horumarinta qeybaha wax-soo-saarka ee dalka iyo in la dhiso hay’adaha qaabilsan wax-soo-saarka, runtii waa mashruuc ahmiyad weyn u leh dalka oo si aada loogga soo shaqeeyey, waxaana si wada-jir ah mashruucan uga soo shaqeeyey Wasaaradda Ganacsiga iyo Warshadaha iyo weli ba hay’adaha dawladda ee Wax-soo-saarka dalka”. Ayuu yidhi Inj. Cabdullaahi Cali Xasan.

Wasiirka Ganacsiga oo hadalkiisa sii wata, ayaa yidhi: “Mashruucani wuxu kor u qaadayaa dhaqaalaha wadankeena, wuxu dadka u abuurayaa shaqo, wuxu lee yahay fursado dhaqaale, wuxu abuurayaa meelahii laga sameyn lahaa warshadaha dalka iyo weli ba sidoo kale inuu innoo abuuraayo tartan dhex-mara hay’adaha wax-soo-saarka ee dalka oo ay ku tartamaan wax-soo-saarka dalka.”.

Xafiiska Wararka Halqaran.com
Halqarannews@gmail.com

1 COMMENT

  1. Kollay heshiis ganacsi ma aha waayo Talyaanigu waddan ahaan Soomaaliya iyo dal kale midna heshiis ganacsi la ma saxiixan karo maadaama uu Midowga Yurubta (EU/EEA) ka tirsan yahay. Sida ii muuqata se waa mashruuc caawimaad ah ee marka ay Soomaaliya suuqyada caalamiga rasmi ugu soo biirto u sahli doona heshiis ganacsi oo degdeg ah ee ay ka saxiixato suuqa ganacsi ee Midowga Yurub (EU) oo ah kan dunida ugu weyn.

    Sida taariikhda ku sugan casrigii ay mandiqadda Soomaaliyeed mustacmaradda ahayd ayaa markii la isku jimeeyay saameynta horumarineed ee ay Woqooyiga iyo Koonfurta ku lahaayeen Ingiriiska iyo Talyaanigu ayaa waxaa caddaatay in uu Talyaanigu billaddaas qaatay. Markii ay labadaasi dib isku soo biireen farqiga u dhexeeyay xagga hannaanka dowliga iyo horumarka guud ba aad ayuu u weynaa xaqiiqdii.

    Madaxdeenu halka ay Nairobi iyo Addis maalaayacniga ku la meereysanayaan waxaa kun jeer u dhaantay in ay caasimadaha Yurubta iyo kuwa kale ee horumarsan taagan yihiin oo ay wax ka soo bisleysanayaan. Dhexdoodii baa isku mashquuliyay si looga indhasaabo.

LEAVE A REPLY

Please enter your comment!
Please enter your name here