Madaxtooyada oo war ka soo saartay Kulankii Madaxda DFS iyo maamul Goboleedyada+(SAWIRRO)

Muqdisho (Halqaran.com) – Madaxweynaha JF Soomaaliya, Mudane Maxamed Cabdullaahi Farmaajo oo guddoomiyey kulan hordhac u ah Shirka Amniga Qaranka oo ku qabsoomay aaladda Internetka ee (Zoom-ka) ayaa Madaxweyneyaasha Dowlad Goboleedyada iyo Guddoomiyaha Gobolka Banaadir uga warbixiyey wada-hadalladii Jabuuti uga furmay DF Soomaaliya iyo Soomaaliland.

Waxaa shirkan ka soo qeyb galay Ra’iisul Wasaaraha XFS, Mudane Xasan Cali Khayre, RW Ku-xigeenka Xukuumadda Mudane Mahdi Maxamed Guuleed, Madaxweynayaasha Dowlad Goboleedyada iyo Guddoomiyaha Gobolka Banaadir.

Waxaa lagu heshiiyey in shirkaas rasmiga ah uu deg-deg u qabsoomo, iyada oo Madaxweynaha JF Soomaaliya uu go’aaminayo goobta iyo wakhtiga shirka.

Madaxweyne Farmaajo ayaa soo bandhigay sida ay uga go’an tahay adkeynta wadashaqeynta Dowladda Federaalka iyo Dowlad Goboleedyada, taas oo muhiim u ah xaqiijinta yididiilada shacabka Soomaaliyeed ee dowladnimada iyo dib u soo celinta qarannimadeena.

Madaxweyne Maxamed Cabdullaahi Farmaajo ayaa xusuusiyey Madaxda ka qeyb galay kulankan muhiimadda wadajirka iyo in loo tanaasulo danta guud, iyada oo la ilaalinayo dowladnimadeenna oo shacabka Soomaaliyeed ay geliyeen maal iyo muruqba.

Ugu dambeyn, Madaxda ka qeyb galay kulankan ayaa soo bandhigay sida ay uga go’an tahay in la sii amba qaado qorsheyaasha dowlad dhiska iyo horumarka dalka, iyaga oo wadajir u soo dhaweeyey qorshaha Madaxweyne Farmaajo ee ku saleysan wadatashiga, is ogolaanshaha iyo u tanaasulka danta guud.

Xafiiska Wararka Halqaran.com
Halqarannews@gmail.com

LEAVE A REPLY

Please enter your comment!
Please enter your name here