Madaxtooyada Soomaaliya oo baaq deg-deg ah u dirtay Madaxda Puntland iyo Jubbaland

Muqdisho (Halqaran.com) – Madaxtooyada Villa Soomaaliya, ayaa ugu baaqday Madaxweynayaasha dowlad goboleedyada Puntland iyo Jubbaland inay ka soo qeybgalaan shirka wadatashiga doorashooyinka ee uu dhawaan ku baaqay Madaxweyne Maxamed Cabdullaahi Farmaajo.

War qoraal ah oo ka soo baxay Villa Soomaaliya, ayaa lagu sheegay, in dowladda ay xal u aragto in dhammaan Dowlad Goboleedyada ay ka qeyb qaataan dhameystirka geeddi socodka doorashooyinka dalka.

Haddaba halka hoose ka Akhriso qoraalka ka soo baxay Madaxtooyada Somaliya:

Madaxtooyada Jamhuuriyadda Federaalka Soomaaliya waxay mar kale ugu yeeraysaa Madaxweyneyaasha Dowlad Goboleedyada Puntland iyo Jubaland in ay ku soo biiraan shirka wadatashiga ah ee lagu dhammeystirayo talo soojeedintii ay isla meel dhigeen Guddigii Farsamada ee ku kulmay Baydhabo 15-16 Febraayo 2021.

Dowladda Federaalka Soomaaliya iyada oo ka duuleysa baahida loo qabo in dalka doorasho loo jiheeyo waxay xal u aragtaa in dhammaan Dowlad Goboleedyada ay ka qeyb qaataan dhameystirka geeddi socodka doorashooyinka dalka, loogana gudbo marxaladdan hadda lagu jiro wada hadal, isqancin iyo in loo tanaasulo danta guud.

Dowladda Federaalka Soomaaliya waxaa ka go’an in dalka loo jiheeyo doorasho, lagana mira dhaliyo heshiiskii 17kii Sebteembar 2020 ay Madaxda Dowladda Federaalka iyo Dowlad Goboleedyada ku gaareen magaalada Muqdisho iyo habraacyadii lagu dhammeystiray fulinta heshiiskaas.

Xafiiska Wararka Halqaran.com
Halqarannews@gmail.com

LEAVE A REPLY

Please enter your comment!
Please enter your name here