Puntland iyo Jubbaland oo war ka soo saaray heshiiskii RW Rooble iyo Midowga Musharraxiinta

Madaxweynayaasha dowlad goboleedyada Jubbaland iyo Puntland, Axmed Madoobe iyo Saciid Deni

Garoowe (Halqaran.com) – Dowlad goboleedyada Puntland iyo Jubbaland soo dhaweeyay heshiiskii ay xalay wada gaareen Midowga Musharraxiinta xilka Madaxweynaha Soomaaliya iyo Ra’iisul wasaare Maxamed Xuseen Rooble.

Puntland waxay caddeysay in ay tahay tallaabo wanaagsan in dowladda Soomaaliya ay qiratay weerarkii lagu qaaday Hoteelka ay degan yihiin Musharraxiinta xilka Madaxweynaha iyo dibadbaxayaal.

‘‘Dowladda Puntland waxay soo dhaweynaysaa heshiishka ay wada gareen Dowladda Federaalka ah ee Soomaaliya iyo Midowga Musharraxiinta xalay oo tariikhdu ahayd 25 Feb 2021, sidoo kalena waxay soo dhawaynaysaa in DFS ay garawsatay masuuliyadda wixii ka dhacay Mogadishu, 19kii Feb, ayna ogolaatay in baaritaan madax banaan lagu sameeyo‘‘, ayaa lagu yiri war qoraal ah oo ka soo baxay Puntland.

Sidoo kale, Jubbaland ayaa dhankeeda soo dhaweysay heshiiskii ay xalay wada gaareen Midowga Musharraxiinta xilka Madaxweynaha Soomaaliya iyo Ra’iisul wasaare Maxamed Xuseen Rooble.

‘‘Jubaland waxay ka rajaynaysaa Dowladda Federaalka ah inay wax ka badasho qaabka ay ula dhaqmayso musharraxiinta mucaaradka iyadoo loo baahan yahay in ay la imaato xal la xiriira caqabadaha kale ee ku xeeran qabashada shir wadatashi ah oo loo dhan yahay oo lagu dhameystirayo arrimaha muranku ka jiray si ay u abuuranto jawi qabsoomidda doorasho ku dhacda si nabad ah oo wadar ogol ah taas oo waafaqsan heshiiskii 17 September habraacyadii lagu heshiiyey iyo Dhuruucda dalka‘‘, ayaa lagu yiri qoraal ka soo baxay Jubbaland.

Ugu dambeyn, Maamullada Puntland iyo Jubaland ayaa ugu baaqay Dowlada Federaalka inay garowsato in saamileeyda Siyaasada iyo musharraxiinta ay xaq u leeyahiin ka qeyb galka daadalada socda ee la xiriira go’aan ka gaarista hanaanka Doorashada.

Xafiiska Wararka Halqaran.com
Halqarannews@gmail.com

LEAVE A REPLY

Please enter your comment!
Please enter your name here